Die Homepage von Frank Kasper - La hempagino da Frank Kasper - La interretaj informoj de Frank Kasper

Mea unesma voyajo ad Westala Berlin - mea samtempa renkontro kun olima prezidanto dil Germana Ido-Societo


Ankore fine di decembro 1989 me komune kun mea lora spozino Marion, quan me mariajis ye l'01ma di decembro 1989, survoye a Nord-Est-Germania, ube ni festis Kristnasko e la yarchanjo che mea patro, vizitis Westala Berlin.
Du dii ante nia voyajo apertesis frontierala punto dop la simbolo dil dividigo di Berlin, la Brandenburga Pordego.
Ni intencis pasar ibe la frontiero inter la lora chefurbo di GDR ed West-Berlin. Ica evento por Marion samtempe esas l'unesma vizito en la lore talnomizita libera mondo.
Pos vartar dum kelka tempo ni e la kontrolo dil pasporti e la visti ni pasis la Berlina muro. Dop la muro ja en West-Berlin nur un metro dop la tablo, ube sidis la kontrolisti di GDR civitano di West-Berlin laute klamis "La muro devez desaparar!"
Alonge la Strado dil 17ma junio pos la apertigo dil frontiero dop la Brandenburga Pordego esis konstruktita dometi di diversa banki, ube la GDRani povis recevar la talnomizita salut-pekunio di 100 DM, se li l'unesma foyo vizitis West-Berlin od West-Germania en la sama yaro.
Marion uzis ica okaziono por querar ica pekunio.
Ni unesme marchis a la maxim konocata loko di West-Berlin, la Kurfürstendamm.
En la tarda posdimezo ni retrovehis per urbala treno (S-Bahn) de la fervoyala staciono Berlin Zoologischer Garten a la frontierala staciono Berlin-Friedrichstrasse. Pos pasar la kontrolo ni vehis per urbala treno a la fervoyala staciono Berlin-Lichtenberg, de ube departis nia treno ad Anklam, ube lojas mea patro.

Me memoris, ke en West-Berlin ankore lojis la konocata Idisto Kurt Linde, quan me anke ja persone konoceskis okazione dil neoficala Est-Germana Ido-renkontro 1977 en la lora chefurbo di GDR.
Pro vizitar lu ni anke interruptis nia retrovoyajo ad Ebersbach komence di januaro 1990 en Berlin.
Cafoye ni trapasis la frontiero che la kontrolpunto Heinrich-Heine-Strasse, qua segun nia opiniono situesis maxim proxime a la Manteuffelstrasse, ube lojis Kurt Linde.
Do, pos pasar la frontiero ni atingis la distrikto Kreucberg, quan on pro la majoritato di olua habitanti, qui esas segun lia origino o la origino di lia ancestri Turkiani, anke nomesas "L'Istanbul di Berlin".
Ni ankore ne konoceskis la Turkiana od Orientala vivmanieri e kulturo til lore e ni tre juis l'atmosfero e l'orientala ordori en la stradi.
Pos ke ni atingis la Manteuffelstrasse ni devis pasar la tota strado, pro ke Kurt Linde lojis ye l'altra fino dil strado.
Fine ni sucesis sonigar ye la pordo di Kurt Linde.
Lu tre joyis pri nia vizito e kordialege bonvenigis ni amba.
Dum la sequanta cirkume du hori lu multe raportis a ni pri lua Ido-vivo ed anke pri lua tempo kom prezidanto dil Germana Ido-Societo.
Fine ni tre emocigive adiis esperante, ke ni ankore rividos.
Regretinde Kurt Linde ja esis tre malada e ne plus povis livar sua lojeyo sola.
Do, Marion e me marchis a la frontierala punto Oberbaumbrücke proxime a la staciono dil urbala treni Warschauer Strasse en Est-Berlin, de ube ni per urbala treno atingis la fervoyala staciono, de ube departis nia treno a la direciono Ebersbach.

En la sequanta yari ni ankore dufoye vizitis Kurt Linde.
Fine di somero 1993 me kun turistala grupo vehis per autobuso a Berlin pro vizitar ferio pri distriktala elektronikili.
Pro manko di tempo por vizitar Kurt Linde, pro ke l'autobuso quik pos la klozo dil ferio departis retre a Nürnberg, me adminime telefonis kun lu e lu tre joyis pri to.
Ica telefonado samtempe esis mea lasta konversado kun lu ante lua morto.

Depos la yaro 2001 ecepte dum unyara pauzo me ipsa esis la prezidanto dil Germana Ido-Societo til l'yarchefkunveno dil GIS en la yaro 2011.
Me pensas, ke me kun mea tota forto e segun mea posibleso plenigis ica ofico segun la skopi di mea precedinto Kurt Linde e segun la skopi dil Ido-movemento.

Yen finas la raporti pri mea experienci pos la chanji en l'olima GDR inter la dio, kande la muro falis, e la komenco dil yaro 1990.

Frank Kasper
Ex-prezidanto dil Germana Ido-Societo



moziloCMS 1.11.2 | Sitemap | Letzte Änderung: La interreta loko de Frank Kasper (23.04.2017, 07:41:50)